МЕНТОРСКА ПОДДРШКА ЗА ГРАЃАНСКИ ОРГАНИЗАЦИИ

Како дел од правната едукација МЗМП нуди и менторска поддршка за граѓански организации.

Основање здружение

Здружение можат да основаат физички и правни лица. Здружение можат да основаат најмалку 5 основачи, при што најмалку тројца од основачите мора да имаат живеалиште или престојувалиште, односно седиште на територијата на Република Северна Македонија (РСМ).

Здружение на граѓани може да основаат малолетни лица со навршена 15-годишна возраст, преку изјава за согласност за основање здружение од нивниот законски застапник, за целите за кои се основа здружението во согласност со закон. Како основачи и членови на организација согласно закон можат да бидат и странски лица кои ги имаат истите права и обврски како и домашните лица, освен ако со закон не е поинаку определено.

Здружението се основа на основачко собрание. На основачкото собрание се донесува акт за основање, програма, статут и се избираат органите на здружението. Здружението се стекнува со својство на правно лице со уписот во регистарот што го води Централниот регистар на РСМ. Запишувањето во регистарот се врши со пријава за запишување која се поднесува во рок од 30 дена од денот на донесувањето на актот за основање.

Потребна документација:

Акт за основање
Стаут верзија
Програма за дејствување
Одлука за избор на органите и податоци за членовите на органите;
Одлука за избор на застапник по закон со неговите податоци
Записник од основачко собрание
Изјава дадена од страна на претседателот на здружението со која се потврдува дека вршењето на дејноста е во согласност со закон и дека се исполнети условите за упис. Оваа изјава треба да биде заверена на нотар.
Пополнета пријава за упис на основање на здружение (достапна на www.crm.com.mk )

Покрај овие документи во прилог на пријавата за основање се доставуваат и:

Покана за свикување основачкото собрание (покана за основачко собрание и иницијативен одбор)
Образец заверен потпис (ЗП) за претседателот на здружението
Фотокопија од лична карта на основачите (физички лица), а за правни лица – копија од тековна состојба заедно со писмено овластување од правното лице за вклучување како основач на здружението, овластување на лицето присутно на основачкото собрание за присуство на собранието и пристапување на правното лице како основач на здружението;
Листа на членови на Здружението (вкупно сите членови), заверена со потпис од претседателот на здружението
Листа на присутни членови на основачкото собрание, со своерачен потпис на секое присутно лице
Фотокопија од лична карта на застапникот/застапниците по закон (правни лица)
Одобрение од Министерство за правда на РСМ доколку во името на здружението е содржан зборот „Македонија” и зборовите изведени од него, како и неговите кратенки
Одобрение од надлежниот орган на Општината, односно Град Скопје, ако во името на здружението се содржани зборови со името на Општината, односно Град Скопје.

Останати обрасци поврзани со основање на здружение и запишување на промени:

Записник за измена на Статут
Записник на Собрание разрешување член на управен одбор
Записник на УО и одлуки промена на Претседател
Одлука за усвојување на пречистен текст на Статут
Одлука за усвојување на статутот
Список на присутни членови (собрание)