Се одржа конференцијата „Зајакнати млади и младински организации – заеднички во акција за позелени општини“

На 18 септември 2024 година, во Скопје се одржа конференцијата „Зајакнати млади и младински организации – заеднички во акција за позелени општини“. На настанот присуствуваа млади активисти, претставници од граѓански и младински организации, како и претставници на општините. Главна тема беше младинското учество во заштитата на животната средина на локално ниво, придобивките од новоформираните локални младински совети, предизвиците и активностите кои досега беа преземени.

Првиот панел се фокусираше на соработката меѓу проектот „Младински активизам за позелени општини“ и општините. Со свои говори се обратија младински претставници од Општина Центар и Општина Гевгелија, кои ја потенцираа потребата од континуирана поддршка и зајакнување на капацитетите на младите, како и важноста на Законот за младинско учество и младински политики.

Вториот панел беше посветен на активностите на локалните младински совети. Претставници од ЛМС Пехчево, ЛМС Кавадарци, ЛМС Виница и ЛМС Зелениково ја нагласија важноста од нивната соработка со општините и придобивките од основањето на младински совети на локално ниво.

Третиот панел ги претстави иницијативите за заштита на животната средина на локално ниво. Младински активисти дискутираа за програмите за субвенции за фотоволтаични панели и соларни термални колектори, подобрување на вело-инфраструктурата, како и активности за намалување на комуналниот отпад и спречување на формирањето мини депонии.

Ги повикуваме сите млади, младински организации, општини и граѓански здруженија да се приклучат кон иницијативите за заштита на животната средина и промовирање на одржливи практики на локално ниво. Вашата поддршка и активност се клучни за подобрување на квалитетот на живот во нашите заедници.

Настанот се одржа во рамки на проектот „Младински активизам за позелени општини” кој го спроведуваме заедно со Go Green – Биди Зелен, Центар за климатски промени/Center for Climate Change иYouth Association Kreaktiv / Младинска Асоцијација Креактив Кавадарци , поддржан од @Delegation of the European Union, Skopje.